中環出更：立法會即時延長產假到14周
上個月發表嘅施政報告中，政府建議將產假由十個星期延長至十四星期。唔少機構都即刻增加產假，尋日就終於輪到立法會喇！身為立法會行政管理委員會主席嘅立法會主席梁君彥尋日宣布呢個喜訊，仲透露明年一月之後就有三位職員受惠添！
梁君彥話，行管會一致通過增加產假。至於資源方面，佢就話涉及嘅數目唔係好大，所以會由行管會支付。育嬰設施方面，佢就話立法會地下有個畀公眾用嘅育嬰室，但由於使用率低，暫時都唔使增加。
容海恩未必可以受惠
立法會議員容海恩（Eunice）早前奉子成婚，仲成為首位喺任內懷孕嘅議員，不過今次延長產假，似乎唔關佢事喎，因為係立法會嘅職員先有得受惠。話雖如此，梁君彥就話已經要求行管會副主席李慧琼同Eunice傾吓。
Eunice之前提過話想修改議事規則，例如容許遙距投票咁，方便配合懷孕嘅議員。梁君彥就話，因為議題敏感同埋牽涉《基本法》，所以會由立法會議事規則委員會處理。Eunice預產假係明年大年初一，只餘大約三個月，唔知佢會唔會成功爭取更多福利或權益，為日後懷孕嘅女議員鋪路呢？
卓妮