中環出更：睇中幼兒未識玩電子產品 陳允誠靠玩具闖出名堂
香港工業早年盛極一時，當時一班工業家以努力不懈嘅精神打江山，不過隨着本港轉為知識型經濟，新一代工業家就要靠食腦先有望闖出低谷。香港工業總會（工總）早前舉行「香港青年工業家獎」頒獎典禮，其中一名得獎者係「中國變形金剛之父」林亮嘅外孫，即行政會議成員兼立法會議員林健鋒嘅姨甥陳允誠（Bryant），佢話依家大部分小朋友都轉玩電子產品，所以佢就集中火力生產針對零至三歲兒童嘅玩具，結果成功殺出一條血路。
Bryant笑稱，三歲前嘅小朋友咁細個，始終玩唔到電子嘢，所以佢就針對呢個市場設計一啲新穎玩具。佢又笑言，屋企兩個仔最幸福，因為由細到大都唔驚無玩具。其實佢咪一樣，外公係玩具業老行尊，自己太太嘅屋企都係做玩具，唔知佢工作時會唔會都好似玩緊遊戲咁開心呢？
施莉琳為買小食做童工
獲獎嘅仲有床品集團第二代施莉琳，佢笑稱自細就做「童工」，記得當年屋企人喺尖沙咀一間百貨公司擺展覽，自己只得十二歲都落去幫手，仲會乘機去地庫買小食，笑認做童工係為咗買小食咁話。另一位獲獎嘅全港各區工商聯永遠會長蔡敬業，佢家族原本做開光碟嘅包裝，但係光碟已接近被淘汰，好彩佢變陣創立美容包裝部門，先至逃過一劫。
工總主席郭振華、「零食大王」戴德豐都有到場，郭振華認同工業家必須保持業務靈活，不過無論昔日抑或今日，「誠信」先係工業家成功嘅必要因素。
卓妮
