李小龍有句名言係咁嘅：「清空你的腦袋，無形，無相，就像水一樣。」偏偏港產官僚一知半解，處理防洪問題時，既唔帶腦袋亦毫無章法，仲要攞市民生命財產嚟較飛，簡直豈有此理。
係咁嘅，居於大澳太平街後段嘅趙小姐向本報投訴，指渠務署防洪安排做啲唔做啲，為咗改善太平街及永安街嘅水浸情況，兩年前起，每逢打風落雨，就喺太平街後段嘅民居後門設置擋水板，引導積水入渠，阻止海水湧向前街。點知顧得頭來顧唔到尾，街尾二十戶居民慘成人肉水閘，好似上次山竹襲港，因為擋水板「谷住海水」而湧晒入屋，趙小姐屋企首當其衝，水深及腰，淪為澤國，財物損失慘重。
你話喇，渠務署官僚係咪頭大冇腦、腦大生草？居然要二十戶街尾居民做人肉水閘，唔通呢啲叫犧牲小我、完成大我？定係想話畀人知，街頭居民條命仔矜貴過街尾居民吖？官老爺防洪變水淹民居，港產廢官係咪廢到肺積水，仲使問嘅。
講真，話特衰政府防洪不力都唔足以反映事實，直頭話佢哋謀財害命就差唔多。好似趙小姐屋企咁吖，打風期間地板湧出水柱，樓宇結構安全危危乎，渠務署居然置若罔聞。土力工程處前處長就話，地板罅噴出水柱，好有可能係屋下泥土被海水沖走，形成水土流失，隨時有倒塌危機，萬一造成人命傷亡，官老爺該當何罪？
最離譜嘅係，唔少大澳居民鬧爆水浸問題嚴重，防洪措施形同虛設，但渠務署死口唔認防洪策略出錯，仲將責任賴落個天度，話水浸係因為風暴潮令海平面上升喎，殊不知轉個頭又話做緊優化擋水板同加強防洪能力研究，乜都係佢講晒。地區團體就講得啱嘞，官老爺淨係識頭痛醫頭、腳痛醫腳，講到尾就係無心治水，建議當局盡快喺大澳三個地點設置巨閘擋水，否則下次翻風落雨，一樣係倒瀉籮蟹嘅咋。
不過講多都係嘥氣，港官做事冇心冇肺，係都唔肯從根源入手，以為求其戙起幾塊擋水板，就可以擋住源源不絕嘅海水，同螳臂當車有乜分別吖？冇計啦，大澳位置偏遠，又唔係權貴集中地，官老爺係冇咁重視㗎喇，換作水浸發生喺門常開、禮賓府，仲唔晨早做咗永久性嘅防洪工程咩。
所以話，呢個政府小事做唔好，大事做唔到。山竹襲港前夕係威係勢大搞跨部門防災，結果災後冇晒影，兩個月過去嘞，爛樹繼續圍城，善後工作繼續甩轆，沿海居民繼續叫苦。旨意廢官防洪，怕且大澳居民都係要年復年忍受水浸之苦咯。