中環出更：返工被耍太極 霍震寰教四両撥千斤
中國武術博大精深，其中太極係學習如何將陰陽五行糅合，講求放鬆、心靜同慢練，需要長時間感受及練習先做到。香港武術聯會會長霍震寰都有學太極，每晚臨瞓前都會練習吓，當係放鬆身體。至於平時返工畀人耍太極咁點算？佢就笑話，要用四両撥千斤喇！嘩！呢招要高手先得(口架)喎，睇嚟佢功力都幾深厚喎！
尋日香港國際社會服務社（國際社）搞咗個大型太極班，慶祝成立六十周年。共有五百位來自六十個國家或地區人士一同耍太極三十分鐘，成功創下「最多國籍人士參與的太極課」健力士世界紀錄。主禮嘉賓霍震寰、灣仔區議會主席吳錦津同國際社行政總裁邱浩波都喺度。
整親膝蓋 邱浩波唔敢亂郁
卓妮見霍震寰耍起太極都有板有眼，佢憶述年輕時喺加拿大讀書，對中國武術好有興趣，於是去唐人街學太極，當時仲畀人笑佢講中文唔係好叻。之後返嚟香港都仲有繼續學，佢慨嘆後生時唔明點解太極要咁慢，後來先知係要畀人喺慢動作當中，感受力度由腳牽動全身再喺手打出去，係一種全身運動嚟。
吳錦津就唔識耍太極，平時都係拉吓筋伸展吓，但佢就好勞氣話被立法會議員「耍太極」喎。事關灣仔區只得一個社區會堂，區議會想喺銅鑼灣摩頓臺起個活動中心，點知上咗立法會三十次都攞唔到撥款，難怪佢咁激氣。該項目將會喺立法會財務委員會審議，佢直言希望反對派議員唔好再耍太極喇。
卓妮見邱浩波無乜郁動，原來佢早前整親膝蓋，所以唔敢亂嚟。佢有練開氣功，所以好多年都無食西藥，依家先食吓營養補充劑，希望快啲好番！
卓妮