都話人無恥便無敵，國泰就深諳箇中三昧嘞。嗱，尋日立法會三個事務委員會聯合召開特別會議，追殺國泰洩密醜聞，國泰係就係派出洋主席道歉，之但係補償免問。咁即係點？即係口惠而實不至囉，即係齋Talk冇意義囉。
真係唔講猶自可，一講把幾火。國泰拖延逾半年先至自爆多個系統遭黑客入侵，九百四十萬客戶資料外洩，仲巧言令色百般狡辯，諗住過咗海就係神仙，殊不知市民反應激烈，輿論狂轟，眾怒難犯下，被迫到立法會解畫。洋主席話喎，為今次事件向港人致歉，形容「上咗艱難一課」，會改善內部匯報制度同繼續聽取意見喎。
嘩，國泰上嘅呢一課，港人嘅代價就大咯。有客戶發現信用卡被盜用租酒店房，又有銀行儲值支付工具嘅客戶未經授權遭轉帳，造成金錢損失，網絡保安專家估計呢啲都係國泰洩密嘅後遺症，況且國泰都呼籲客戶小心網絡「釣魚」，證明洩密後果嚴重，輕輕一句道歉就想甩身，世上有冇咁便宜嘅事呀？立法會議員就講得啱嘞，國泰冇好好保護客戶私隱，仲衰到刻意隱瞞，一錯再錯，必須作出賠償。不過國泰就裝傻扮懵，一味耍賴，有高層人肉錄音機上身，堅稱受影響客戶可以向顧客服務部聯絡喎，一副你吹佢唔脹咁款。自己犯錯仲要人主動聯絡，擺明卸責，國泰道歉有冇誠意，大家心照喇。
咁當然，國泰之所以有恃無恐，唔係冇原因嘅，最大所恃咪就係港府縱容囉。莫講話《私隱條例》冇強制規定企業洩密必須通報，就算調查證實企業犯錯，都係罰款五萬蚊咁大把，隨時買張商務機票都唔夠，國泰真係驚你有牙。反觀歐盟規定企業必須限時通報，國泰隨時面臨數十億元巨額罰款，英國仲有律師發起集體訴訟添，國泰即時變咗鵪鶉，仲點敢叫受害人打電話查詢咁寸嘴吖，呢啲咪就係有監管同無王管嘅分別囉。
再講吖，國泰店大欺客早有前科，航班延誤有之，機師漏帶航圖折返有之，機件故障迫降又有之，最離譜係機位大幅超賣，當乘客人球咁踢，但有邊次受到港府懲罰吖？最可怒係高官挾乘客利益說事，話懲罰航空公司會造成機票加價壓力，點知轉個頭又容許航空公司自行決定收取客運燃油附加費，國泰即時響應加價，獅子開大口，名正言順打劫乘客荷包，問你服未。
所以話，一個巴掌拍不響，國泰墮落，都係拜港府整慣姿勢所賜咋。冇計嘞，港府對小市民喊打喊殺就叻，對住國泰呢啲大企業即刻自矮三分，係唔係雙重標準，欺善怕惡，仲使問咩。