政情：愛女遊學 張國鈞拒做「跟得爸爸」
早前有小學生原本打算去泰國參加數學比賽，點知去到當地就畀當地導遊介紹去學「養鬼仔」，真係嚇壞學生哥。立法會議員張國鈞（Horace）育有兩個分別讀緊幼稚園同小一嘅囡囡，佢就似乎冇有怕，話學校搞遊學團嘅指引好嚴格，加上學校通常嚟嚟去去嗰幾趟地方，所以都通常冇問題。問佢會唔會跟埋囡囡去？佢就耍手擰頭話唔做「跟得爸爸」，想兩個女獨立啲喎。
Horace話之前有內地碩士生想去佢嘅辦事處實習，該碩士生媽媽竟然同佢一齊面試，又試過做健身時見到有男仔喺媽媽陪同之下報名。佢同太太都唔想兩個女大個係咁，所以一直都訓練佢哋獨立啲，如果學校搞遊學團，都放心畀佢哋去咁話。
平時要求兩女自行點餐
佢仲話一般幾歲嘅小朋友出去餐廳食飯時會同父母講自己想食乜嘢，等父母點餐，但佢同太太就會要求兩個女自己同侍應講，就連之前去日本旅行，都係兩個女用英文話畀侍應知，佢哋想食乜咁話。有時大人去日本旅行，喺當地餐廳點餐都可能會「雞同鴨講」，佢兩個女可以自己搞掂，都認真抵讚喇！