政情：約開會永唔嚟 邵家臻轟羅致光 三次放飛機
學生功課愈嚟愈多，讀書壓力愈嚟愈大，搞到過去幾年發生多宗學童自殺嘅慘劇。政府特此喺舊年十月成立咗「防止青少年自殺工作小組」，由勞工及福利局局長羅致光統籌。不過，市民似乎就唔太滿意羅致光嘅表現，全年都唔知個工作小組做過乜，有團體多次想約見佢都約唔到，尋日直情鬧佢放飛機！但查實唔止民間團體約唔到，連有立法會議員都話好難約，唔知羅致光因乜嘢事咁忙，個個都唔得閒見呢？
其中一個約唔到羅致光嘅民間團體係防止學生自殺民間聯席，佢哋一直都希望可以同羅致光會面，仲話羅起初都答允，可惜後嚟一而再、再而三咁改期，最早約定喺本周一會面，其後推遲到本月二十三日下午五時半，之後又再改為五時，聯席為咗見面都肯遷就羅，但最終羅都係以有緊急事要處理為由，再度取消會議，仲要冇再提供會面時間，搞到有份參與嘅立法會議員邵家臻嬲到爆，炮轟羅放飛機！換言之，即係羅致光放咗三次飛機。
當局似未睇十月報告
另一議員許智峯亦喺立法會質問工作小組喺過去一年做過啲乜？今年十月交嘅報告又講咗啲乜？不過政府就似乎未睇份報告，答唔到更多細節只係話會撥資源去執行相關建議。佢對政府嘅回覆半信半疑，亦曾約過羅好多次，都冇成功會面，促請政府正視學童自殺問題咁話。
辯稱多團體排隊見面
雖然個個都追殺羅致光，但勞福局就唔係咁講，佢哋話其實可謂「有求必見」，絕對冇放飛機呢回事，不過正因為咁，所以好多政黨、團體、商會等都排緊隊，的確係有啲難約。至於今次聯席嘅個案，佢哋話本周一早就講咗因事唔得，所以先提議二十三日，但都仲未落實，根本唔係多次改期，只係未約到一個雙方都得嘅時間。
勞福局仲話平時如果係議員約佢哋，係可以透過議員辦事處直接聯絡局方，但民間團體就唔得，佢哋要入信畀局方再作安排，不過有時啲團體只係提出一個時間畀佢哋，咁一旦局方唔得就要花時間再交涉，但佢哋就強調唔會唔見，只係未約到啫！