中環出更：分拆運房局 建制翻泛民舊帳
政府喺房屋、交通問題上苦無對策，外界有聲音認為分拆負責呢兩個政策範疇嘅運輸及房屋局。有泛民議員尋日喺立法會大會提出口頭質詢，要求當局重新考慮重組運輸及房屋局及發展局的職責，以處理土地及房屋問題。建制派議員梁志祥翻舊帳，指早喺上屆政府已提出架構重組方案，惟當時反對派對人不對事，先令架構重組被拉倒、最後無疾而終。
麥美娟：陳帆唔係超人
提出質詢嘅泛民議員指現時市民輪候公屋需等逾五年，沙中線工程又超支，颱風「山竹」令全港交通癱瘓，港鐵四線「冧檔」，認為負責的運房局應分拆，以處理好房屋同交通問題。另一議員譚文豪更指即使唔係運房局局長陳帆出任局長一職，而係其他人做局長亦會應接不暇，又建議政府應就鐵路事宜設立鐵路署，以掌管鐵路相關事宜。
工聯會嘅議員麥美娟亦話陳帆唔係超人，「即使係超人都會瞌眼瞓」，冇可能一人兼顧海、陸、空範疇，望政府重組架構，以精準解決市民關注問題。紡織及製衣界議員鍾國斌就認為並非只係運房局問題，而係整個政府架構均出現問題，政策局工作分配不公平，故應檢討整個政府架構。
政務司司長張建宗回應話唔應該將個別爭議同架構重組扯上關係，但明言現屆政府會喺任期內展開探討運房局重組嘅工作，望有關工作可以喺現屆政府嘅任期內完成。
卓妮