中環出更：黃進達旅行買藥當紀念品
去旅行少不免要買手信畀親朋戚友，唔少人都會選擇當地藥品做手信，好似旅遊業議會主席黃進達（Jason）都會買，仲話視呢啲藥品為另類紀念品喎。
Jason話港人外遊時買藥品嘅行徑已經出現多年，主因係有啲長者聽講海外有藥油功效好，又有獨門秘方，傳傳吓就興起呢股買藥熱潮，而日本就係醫學發達同包裝精美，所以吸引到唔少港人垂青。至於佢外遊時都有買藥嘅習慣，主要係畀好誇張嘅藥名所吸引，而託賴自己未有需要用到呢啲藥物。
尋日係香港潮州商會青年委員會嘅午餐會，Jason身為青委主任委員當然要主持大局，其他青委成員好似名譽參事章曼琪、副主任委員龔雅璇、參事張少鵬同委員馬竣耀等都有出席。
從事藥業嘅馬竣耀話日本藥廠嘅生產環境同過程都比香港好，而且過去都有研究證明日本嘅藥質素較高。不過，佢就話如果依照說明去服用漢方藥，效用或者比唔上中成藥，因為日本規定嚴格以免用藥過重而出事，所以每劑藥嘅效力都比較輕。
龔雅璇：監管嚴令傳統配方消失
同行嘅龔雅璇就話冇喺外地買藥嘅習慣，但身邊唔少朋友都會買藥，同去外國買化妝品道理一樣。佢認為香港人保健意識同中藥認受性有所提高，但政府對中藥嘅監管嚴格，令到唔少傳統配方被迫消失，但向好方面睇就係加強咗公眾對中藥嘅信任。
張少鵬就話做藥都要創新，好似曾經有婆婆反映孫女將藥膏遷移去另外較美觀嘅容器度，令佢將自家品牌嘅藥膏推出新包裝，但舊包裝仍然存在，以免用開多年嘅客人認唔出，反而被當成冒牌貨喇！
卓妮