魯迅有篇散文係咁講嘅：「在我的後園，可以看見牆外有兩株樹，一株是棗樹，還有一株也是棗樹。」若然大作家生活喺今時今日嘅香港，呢句說話可能會改寫為「一株是塌樹，還有一株也是塌樹」，事關颱風山竹走咗兩個月，全港仍然塌樹多多、危樹處處，搞到市民一步一驚心，想「出入平安」都唔容易呀。
呢，本報記者近日到觀塘順利邨遊樂場，發現仍有倒冧嘅樹木打橫瞓喺行人路，市民行過都要烏低身，否則分分鐘「中頭獎」。而喺北角賽西湖公園，亦有一棵巨型石牆樹成幅剝落，好似計時炸彈一樣，唔知幾時跌落嚟，附近晨運嘅市民話唔擔心就假。仲有呀，太子界限街近何東道有棵大樹，樹身出現直徑四十厘米大窟窿，幾時頂唔住冧落嚟壓向旁邊馬路上嘅車輛同行人，真係冇人話得埋㗎。喂，風災過後唔係兩日，而係差唔多兩個月，市面仲係一片混亂，官老爺知唔知醜字點寫㗎？
沒有最醜，只有更醜！對於遍布各區、歪歪倒倒嘅爛樹，你估政府點處理呀？講都冇人信，淨係喺殘枝綁上膠帶作警示，又或者搵條極幼嘅紅色尼龍繩綑幾圈，以圖固定樹身。好心官老爺咪咁傻咁天真啦，你估家陣求姻緣咩，一棵樹冧落嚟閒閒哋幾百磅甚至幾千磅力，鞋帶咁幼嘅尼龍繩點頂得住呀？港府當年成立樹木辦，有關人員走馬看花，單憑目測分辨邊棵樹有冇病蟲害及倒塌危機，已經夠晒兒戲，點知家陣啲樹已經爛咗，隨時倒塌傷人，咁牙煙嘅情況下，官老爺仍然唔嗲唔吊，清理慢過烏龜，仲用啲咁「新穎」嘅手法嚟自欺欺人，唔係靠害係乜嘢呀？
講到底，港府既唔識種樹，又唔識驗樹，搞到全港處處都係頭重腳輕嘅短根「花盆樹」，平時打一場風就倒塌無數，一片狼藉，有好多手尾要跟，更何況好似山竹咁幾十年一遇嘅災難級數。難為官老爺仲一味死撐，話各部門分三個階段清理塌樹，全部工作預計明年第一季完成喎，咪畀人批中，以港府凡事必拖嘅作風，隨時拖到明年颱風季來臨都未必搞得掂。
家陣講緊清理危樹塌樹啫，又唔係登月上火星嘅高科技，冇理由咁都要一拖再拖。如果當局真係唔夠人手嘅，大可以單聲叫市民義務幫手，亦可以效法外國成立災後基金，資助參與善後工作嘅私人團體。港府乜嘢都缺，就係唔缺錢，用錢可以解決嘅問題都唔係大問題，官老爺咁都唔識做，點止守財奴咁簡單，直頭蠢得交關！
睇到喇，港府大事唔識做，小事做唔好，仲大諗頭到要搞填海造島大工程，簡直不自量力。