「國泰航空，愈做愈燶」，這八字真言已經成為定律！國泰因管理不善，從全球最佳航空公司排名節節下滑，失誤多到一匹布咁長。一間公司愈做愈燶，好明顯就係不思進取，不謀求改進，不以客為尊，差到離罩也沒有恥感，不知服務顧客為何物，整整吓習以為常，神經麻木，就再不懂進取，想翻身就難矣！
日前，國泰航空一日內連續發生兩宗飛機延誤事故，一班原定於凌晨一時五十分飛往日本大阪的客機，疑因引擎故障足足延遲近五小時；另一早上十時五十分飛往上海浦東嘅港龍航班，據報因機件故障延誤三小時。唉，又係機件故障，為何之前唔認真檢查清楚？一而再、再而三的機件故障，你話乘客有得揀，又點會再幫襯？有商務客被迫取消會議，打亂公幹行程，痛斥國泰服務差，加上早前爆出外洩九百多萬乘客個人資料醜聞，表示會盡量避免再搭國泰。
國泰近年服務每況愈下，自砸招牌有目共睹。知名歷史學者陳明銶原定上月底從三藩市搭國泰機到香港參加學術論壇，據悉在機場的國泰貴賓室廁所內暈倒，十八個鐘頭後始被發現，結果不幸逝世。事件令人納悶：航班起飛前例牌有最後召集，明知有貴賓未入閘，若肯行多步去貴賓室跟多眼，話唔定可以避免悲劇發生，難怪家屬質疑國泰間接導致乘客失救。國泰對貴賓尚且如此闊佬懶理，對普通乘客可想而知，像機位超賣令顧客慘淪人球；波音機隊嘅經濟客艙，由原來每行九座位增至十座位，每個收窄一點四吋，乘客要坐逼啲，更為空姐、空少工作帶來不便。此外，國泰又因燃油對沖虧蝕嚴重，成日聽到佢哋裁員救亡，搞到人心惶惶士氣低落！
古人說：君子脩美，雖未有利，福將在後至。國泰只知急功近利，不懂改善服務，一味諗縮數想賺到盡，老朽恐其即使有利，禍將後至矣！