政情：性小眾工作坊受襲 趙佩玉斥周一嶽零反應
性傾向歧視條例家庭關注組成員趙佩玉自從今年三月參加立法會補選失利後，已經甚少公開露面，但向來反對就性傾向歧視立法嘅佢，早前就出席一個性小眾論壇，繼續大力反對相關嘅立法工作喇。
認為自己被逆向歧視
趙佩玉講起，曾經出席一個工作坊表達反對立法嘅意見，但遭兩名跨性別人士襲擊，包括被吐口水、抓傷等，不過同場嘅人就毫無反應，亦無上前保護佢，當中包括平等機會委員會前主席周一嶽。佢認為自己被逆向歧視，如果立法後，相信呢種情況會更加普遍。
佢又話曾經做相關嘅資料搜集，發現有變性人要畢生注射賀爾蒙而患病，直指注射賀爾蒙嘅後果令人壽命縮短，所以愛佢哋就要反對立法喇！見佢發言猶如機關槍，連主持人叫停都停唔到，睇嚟佢等咗呢個發言機會好耐。