政情：卿姐預約FCC場地 落埋訂都有阻滯
香港外國記者會（FCC）第一副主席、英國《金融時報》亞洲新聞主編馬凱（Victor Mallet）自主持香港民族黨召集人陳浩天午餐會後，就先後不獲港府續發工作簽證及拒絕以遊客身份入境，惹來港府打壓新聞自由嘅批評。前立法會議員劉慧卿（卿姐）尋日透露，早前預約FCC場地搞研討會，連訂金都畀埋，但仍然遇阻滯囉！
話要有董事會批准先租得
卿姐原定今日喺FCC舉行一個有關香港民主自由嘅研討會，仲已經畀咗五千元訂金，但尋日就收到FCC經理致電，話必須得到董事會批准先可租場。不過卿姐話佢明明一早已經同FCC主席聯絡，更獲轉介其他職員去跟進。
雙方經過一輪交涉後，最終確認研討會可如期進行，不過佢所預約嘅房間人數上限只有三十六人，講明到時人數唔可以超出上限，而扣除嘉賓後就只有三十個名額供公眾先到先得，今次真係手快有、手慢無囉！