政情：高佬賢呻難請人 打感情牌留議助
香港現時失業率為百分之二點八，接近全民就業，唔少行業都面對請人難嘅問題，連立法會議員都唔例外。漁農界立法會議員何俊賢（高佬賢）就呻好難聘請議員助理，因為議員辦事處營運開支津貼唔多，搞到議助薪金偏低，所以要留住議助都要靠打感情牌咁話。
請食飯慰勞人才
高佬賢話，議助薪酬一般都只有一萬多元，甚至低至七千元都有。市場上搵份二萬多元嘅工並唔難，所以議助好易流失，為咗挽留人才，惟有多啲請食飯慰勞佢哋，必要關頭仲要落足嘴頭氹議助，希望用感情打動議助，直言︰「冇咗佢哋真係會死！」
高佬賢喺一眾議員當中都唔算孤寒老闆，事關雖然佢嘅議助人工最高嗰個都只係得兩萬多元，但佢都有大手筆「獎勵」員工，今年一月佢就向六名議助合共發放近二十萬元獎金同工作津貼。過往都有議員要求增加津貼，以便為議助加人工，不過情況都冇乜改善。不過咁，要做好老闆，不妨諗吓用自己份糧作補貼喇。