政情：風災善後 離島撥款混亂 梅窩冇份嬲爆

根據區議會文件，有九項由離島民政事務處建造、維修同保養嘅設施被山竹破壞，包括三項喺坪洲嘅設施，及六項喺南丫島，合共涉款一千七百七十萬元。各類工程最早可以喺本月展開，而南丫南蒲台大灣行人橋重建最遲，要等到明年七月。

黃文漢日日打1823投訴塌樹

黃文漢話上次會議已經講過，梅窩萬角咀村啲路爛晒，又有好多塌樹，自己更日日打一八二三政府熱線，又去信民政事務專員李炳威，點解今次撥款嘅項目都冇包括在內？佢質疑上次開會南丫島得兩個項目，點解依家變六項，係咪撥款搞梅窩就唔得，佢都唔知點樣同村民交代。

此話一出，南丫南鄉事委員會主席兼區議員周玉堂即急急解畫，話之前同李炳威傾過，唔止南丫島有問題，離島好多區都未搞掂，對方先解釋會用唔同撥款復修。周斥責當局同區議員溝通不足，講得唔清唔楚，變到好似區議員爭資源咁，叫政府列清單講明各區工程進度由咩部門跟進。

楊善雯就澄清唔係唔做，只係用其他撥款做，應允列清單畀番區議員參考。離島民政事務處高級工程督察黎明有亦幫口解釋，話萬角咀村項目會動用鄉郊小型工程撥款跟進，叫黃唔使擔心。

樊志平唔等政府幫 自己搞掂

另外，東涌鄉事委員會主席兼區議員樊志平更鬧爆民政事務處，話咪以為東涌冇事，只係大家太心急自己搞掂，坦言等得政府搞「我哋就死咗喇！」其實唔使咁勞氣嘅，下次再有事，可以叫發展局局長黃偉綸落區幫幫手，事關佢喺山竹後執樹表現得好落力。

不過，其實鄉郊同地區小型工程，都係民政事務總署嘅撥款負責，只要清楚話畀區議員知幾時做，大家都好交代！但一個部門搞風災善後都東一忽，西一忽，民政事務總署署長謝小華真係責無旁貸，應該檢討吓，免得去其他區再搞出個大頭佛喇！