中環出更：何啟明橫額被𠝹 反成打卡熱點
做過地區工作嘅人，十之八九都曾經被人𠝹橫額，立法會議員何啟明近日喺社交網站上載咗一張相，見到佢同工聯會社區幹事李健聰喺被 𠝹爛嘅橫額度伸個頭出嚟，好搞笑。何啟明話，橫額被𠝹後，見到區內嘅小朋友係咁影相擺上網，佢就有樣學樣，仲話嗰度變成竹園南村嘅打卡新熱點，睇嚟因禍得福噃！
自嘲啱任何人玩3D
何啟明喺社交網站貼完相，又寫「依家『任何人』都可以放返（番）個3D真人頭上去，得左（咗）」。佢話，以往佢嘅橫額好少被人整，啲人多數都係整黨友、資深立法會議員黃國健，依家到佢開始被人整，即係知名度高咗，可能都係好事。
佢又話，只有呢張橫額係被人𠝹得咁得意，淨係𠝹走個頭，「可能係用嚟當收藏品，或者打小人」，但就唔打算報警啦，因為附近冇閉路電視，相信好難捉到人咁話。
卓妮