中環出更：陳克勤學舞獅助選 太攰唔願練
動作片係其中一種好受歡迎嘅電影類型，唔少人仲因此而決心習武，練番一身好功夫。立法會議員陳克勤早前出席香港國術總會（總會）舉辦嘅國術大匯演時，就話冇練過武，不過練過舞獅，事關民政事務局局長劉江華未入政府前做過立法會議員，佢曾經同劉組成名單參選，當時兩人一度學過舞獅，諗住為選舉搞搞新意思，點知舞獅實在太攰，所以練咗幾次就放棄咗喇！
陳克勤話，當時佢做獅尾，長期彎住條腰好攰，而劉捧住獅頭都覺得太重，所以好快就放棄。事後諗番都覺得放棄係明智嘅，因為如果繼續練落去嘅話，劉就要企上去自己身上舞獅，諗吓都覺得頂唔順喇！
胡炎松少林寺學八段錦
港協暨奧委會副會長貝鈞奇、總會主席王嘉恩同秘書長歐陽鳳盈都喺度，歐陽鳳盈就係睇完動作片後覺得好型，所以決心習武，佢初初諗住學詠春，後嚟機緣巧合下學咗八極拳，但係師傅話八極拳比較適合男仔，所以就轉咗去學八卦掌。佢笑住話練八卦掌嘅步法要成日圍住個垃圾桶轉，有時真係轉到頭都暈埋。
王嘉恩就話，其實習武多少都會頭暈或受傷，佢細個都練到成身傷，依家年紀大咗啲，傷患就出晒嚟，最嚴重試過椎間盤突出。所以佢話習武唔單止要搵個好師傅，仲要有個好軍醫先得喎！香港潮屬社團總會常董胡炎松都有到場，唔通佢都係武林高手？胡就笑笑口話自己唔多打得，不過的確曾經同個仔去少林寺參加暑期習訓，練過少少八段錦，依家有時咪同人講笑，話喺少林寺出嚟囉！
卓妮