政情：白鴿黨新東內亂 區鎮樺 莊榮輝 冧友爭櫈仔
民主黨（白鴿黨）近排頻爆內亂，一波未平一波又起。繼早前爆出「雙牌頭」風波之後，唔經唔覺戰線已經蔓延到新界東支部選舉喇！有消息指，屬前線派系嘅大埔區議員區鎮樺已經報名參選支部副主席一職，希望可以爭取連任，而佢嘅對手就係同該黨立法會議員林卓廷分屬友好嘅莊榮輝。區鎮樺同林卓廷過去屢傳不和，今次莊榮輝同區鎮樺兩人爭櫈仔，難免令人聯想為派系鬥爭。
據悉白鴿黨新界東支部選舉將於星期五舉行，前日截止提名。今次一共有十三個提名，將會競逐九個職位，包括五個常委。當中新界東支部主席周錦紹同主管財政嘅司庫徐維奇分別爭取連任，兩人都冇競爭者，所以屆時兩人獲得足夠信任票就會成功連任。
莊：唔係參選就贏
而喺常委選舉中，同莊榮輝一齊近年由港島支部轉會嘅冼卓嵐、同林卓廷同屬北區區議員嘅陳旭明都有報名參選。另一邊廂，同區鎮樺一樣屬大埔工作隊嘅文念志、區鎮濠亦報名參選常委，當中文仲係現任常委添。喺咁嘅情況下，更加令人覺得兩派人喺今次選舉中「冧友」。
莊榮輝接受查詢時，話今次參選係希望為黨服務，希望令個黨更加團結。佢解釋，支部主要係做聯繫同埋溝通，而自己曾經做過港島支部嘅常委，對運作有一定嘅認識。佢仲話，唔係一參選就會贏，都要靠黨內成員投票喎。
區感失望被封殺
區鎮樺接受查詢時話，今次佢哋只係派出四人參選，當中有三人都係爭取連任，明顯唔係想霸晒啲位，但見到對方有成七人參選，覺得失望，同埋感到被封殺。佢仲話，其實新界東支部一向都由唔同板塊組成，區域範圍包括沙田、大埔、北區及西貢，而唔係由任何一個派系壟斷，即使現屆嘅支部常委都係咁，大家相處都好和諧，冇乜特別爭拗。不過依家情況變成咁，佢只能盡力同黨友解釋參選原因，希望未來常委會喺唔同嘅持份者齊參與之下，令支部可以健康發展。