中環出更：背痛又腳痛 鄭莉梅寧游水唔跑
每個人都有自己擅長嘅運動，但體育界人士出席籌款活動，未必有得玩番自己最叻嗰樣嘅。好似尋日香港小母牛舉行「競跑助人」籌款活動，香港游泳代表鄭莉梅（Camille）都有出席，講起今次要跑一公里時，佢笑指寧願係游一公里，因為自己好少跑步，仲有背痛同腳痛添。嘩！咁仲跑？
Camille就笑指，都係一公里啫，而且係為咗籌款嘛！講起近況，佢話依家啱啱開始重新訓練，早前趁住有空檔時間，特別去咗外國探望家人同埋溫書，佢依家讀緊碩士，都有擔心訓練會影響學習，不過好彩教授都對佢好好。
小母牛籌款委員會委員張詩培同鄧慶治都有到場，但就冇落場跑。張詩培話因為要幫手招呼來賓，所以好多年都冇跑，下年一定爭取跑喎。鄧慶治就話，膝頭受尿酸影響，依家食緊藥，希望練習吓，下年會跑到啦！佢又話，今次籌款目的係希望幫助貴州、成都及湖北等內地貧窮農民搞合作社，自力更生。
見到記者 楊潤雄忍住唔喘氣
多名現任及前任高官都有落場跑，政制及內地事務局前局長譚志源就話，民政事務局常任秘書長謝凌潔貞（Cherry）明明比賽前話唔識跑，點知一開波，跑得快到有塵，佢同教育局局長楊潤雄、財經事務及庫務局前局長陳家強及小母牛董事局成員許漢忠就互望一眼，決定「追啦！」Cherry聽完就話要幫譚志源改個花名叫「譚老作」喎！卓妮見佢哋跑完後冇乜喘氣，楊潤雄就話係因為見到記者，即刻忍住喎。
卓妮