政情：陳學鋒冇時間踢波 擺街站當運動
中西區區議會副主席陳學鋒最近參加咗地區團體搞嘅一個足球邀請賽，負責守龍門，仲喺Facebook貼咗佢比賽嘅英姿！佢話自己有成二十年冇踢足全場，唔知佢仲保唔保持到舊時水準？
一問之下，佢話當然唔及後生時啦！事關佢年輕時成日踢波，雖然冇參加校隊，但都非常熱愛足球，基本上一放學就同同學一齊去球場，當時唔止守龍門，直頭乜嘢位置都踢過，可惜年紀愈嚟愈大，工作愈嚟愈忙，已經好少再搵朋友一齊踢喇！
佢話依家間唔中有同讀緊小學嘅囝囝一齊踢，殊不知今次參加正式比賽，對手就係香港足球女子代表隊，雖然對手都就住佢哋嚟踢，但結果都係慘敗收場。不過佢都享受比賽，當係做吓運動，所以依家平時盡量行多啲，甚至勤力啲擺街站，就當係做運動咁話！