未入正題前，功夫茶想先吟首詩：「關關雎鳩，在河之洲；窈窕淑女，君子好逑。」呢首《詩經》開篇之作〈關雎〉描寫美好愛情，千百年來唔知感動幾多人，但係落喺本港淫審處眼中，難免係淫褻不雅作品，事關「鳩」喺廣東話中係粗詞，而「窈窕淑女，君子好逑」，可以被屈係教壞細路偷食禁果，分分鐘下令《詩經》包膠袋o架。
唔係老屈淫審處，而係人人皆知淫審處係香港之恥，連世界有名嘅大衞像同日本作家村上春樹嘅作品都可以評為不雅，又有乜嘢係冇可能吖。
話說早前香港書展，村上春樹長篇小說《刺殺騎士團長》被淫審處評為第二類不雅物品，一時激起全城狂鬧。立法會尋日跟進呢單嘢，唔少議員狂炳淫審處至今都冇交代本書究竟邊部分內容係不雅，作風保守兼過時，而且評審準則一時一樣，仲難捉摸過海底針。
講真，淫審處添煩添亂，鬧出嘅國際笑話不計其數，將有機會問鼎諾貝爾文學獎嘅大作家作品視為淫褻，又或者為享譽世界嘅雕像扣上不雅帽子，對佢哋嚟講只係小菜一碟。鬼咩，依家嘅淫審制度荒腔走板，大字唔識得幾粒嘅都可以自薦做審裁員，諗都諗到水準一定參差喇。中國古代有「風不動，幡不動，心動」嘅佳話，換作喺今日香港，咪搞出「像不淫，書不淫，係淫審員個心淫」嘅鬧劇咯。
係人都知，淫審處冇嘢叻，最叻黑箱作業，雙重標準，最經典嘅莫過於同一輯外國女星Kelly Brook嘅相片，登喺東方報業集團旗下報紙就評為第二類不雅，登喺壹淫媒旗下爛果報就被評為第一類非不雅，登喺本港有售嘅外國雜誌就連送檢都慳番，遑論評級。淫審大玩三重標準，你話當中冇不可告人嘅秘密，連三歲細路哥都唔信啦。
講到底，淫審處根本就唔係一般嘅機構，而係港英時代嘅遺物，簡單來講就係負責執行政治任務，用嚟打壓異己嘅工具。講到淫褻咯喎，全港最淫、最賤、最無恥、最卑鄙下流嘅咪壹淫媒囉，但係淫審處對壹淫媒長期放水，反而對正義傳媒就處處玩針對。梗係啦，正義傳媒秉持第四權天職，以監察政府為己任，揭露過嘅劣政醜聞不勝枚舉，搞到庸官劣吏大出洋相，老羞成怒咯，咪放出淫審處呢頭惡犬咬人，滿足報復心理囉。
講多無謂，食多會滯，淫審處呢個廢衙門與其繼續獻世，唔係將藝術作品睇成鹹濕，就係為港府充當殘害忠良嘅打手，倒不如索性趁早執鬼咗佢，總好過嘥納稅人米飯吖。