南韓人氣模特兒都有一個共通點，就係如果憑住某種優勢，例如迷人樣貌、火辣身材或動人氣質而冒起嘅話，喺其模特兒生涯中，仍會繼續發揮呢種優勢，但係對李孝英嚟講，認為最重要係不斷變化，先至可以令模特兒之路行得更遠。
堅持住成功嘅要訣，有人認為咁做係善用自己嘅優勢，亦有人認為係一直食老本，對李孝英嚟講，好明顯佢認同後者，事關佢由出道至今，都勇於接受唔同嘅挑戰，不斷令自己進步，兼且人氣愈嚟愈高。
喺南韓首爾出生嘅李孝英，對模特兒事業相當堅持，但原來佢並非一開始就諗住以模特兒作為自己嘅事業，畢業於明知專科大學兒童與青少年福利系嘅佢，希望能夠成為社會工作者，致力幫助兒童及青少年。不過夢想總會同現實有所差距，喺讀大學期間，佢發現自己對模特兒工作產生興趣，同時又希望能夠接觸到唔同類型嘅工作，擴闊視野，於是佢透過朋友介紹到模特兒事務所應徵，憑住出眾嘅三圍、高挑身材及精緻嘅五官，成功獲得取錄。
由於李孝英零工作經驗，所以先兼職做攝影模特兒，邊工作邊累積經驗，同時亦係一種考驗，睇吓能唔能夠適應呢個行業。經過一年之後，佢發覺自己對模特兒工作嘅興趣有增無減，同時表現亦得到事務所肯定，便正式成為職業模特兒界一員，而首個工作安排，就係以車模身份喺汽車品牌車展上亮相。
喺處女演出之後，李孝英參加模特兒大賽，憑住迷人嘅樣貌同前凸後趷嘅身材，奪得最具人氣獎。隨住人氣大爆發，佢先後喺釜山同首爾多個大型車展上登場，又以賽車女郎身份喺各個賽場上演出，而佢每次出現都必定成為展場上嘅焦點之一。及後佢參加另一個備受注目嘅模特兒選拔大賽，結果奪得最上鏡模特兒獎。
李孝英頻頻喺模特兒比賽獲獎，人氣不斷提升，但係佢認為一味以性感造型示人嘅話，總會有一日被人睇厭，因此佢積極尋求演出上嘅突破，轉換好多唔同形象，結果粉絲十分受落，尤其係以成熟女性形象示人，更係迷倒一眾男士，為佢迎嚟事業上嘅另一個高峰，而喺2014年舉辦嘅亞洲模特兒大賽中，佢更奪得最佳賽車女郎大獎。除此之外，佢接觸唔同範疇嘅工作，從配音到商品代言人等，積極擴闊工作領域。時至今日，佢唔單止成為一位人氣模特兒，同時喺車模及賽車女郎界都有相當嘅地位。
簡介：李孝英除咗樣貌迷人，一對激凸雙峰分量十足，真係着乜嘢服裝都予人驚艷嘅感覺，若然稍為性感嘅話，更係輕易成為男士們嘅焦點。問到佢最滿意自己邊個身體部位，佢認為一對長腿最誘人，唔知大家同唔同意呢？如果大家想了解佢多啲，就要Click入呢個網站喇！
網址：http://cafe.daum.net/leehyoyoung
出生地：首爾
身高：176cm
三圍：34-25-36
撰文：魂