港珠澳大橋通車以來亂象不斷，三地口岸「苦也」之怨聲不絕，周日是首個人流高峰日，卻因來往三地口岸的接駁巴士「金巴」班次不足兼難以消化大量旅客，逾千人蛇餅分別出現於香港及澳門口岸，有旅客苦等逾兩小時才能上車，不少候車市民鼓譟，狂呻「貼錢買難受，見過鬼怕黑」，稱「下次都係搭船穩陣啲」！
林鄭月娥在大橋開通儀式上致詞時，稱對香港能參與這個國家級基建工程感到無比自豪，表示大橋是香港一年內相繼開通的三大跨境基建之一（另兩個是廣深港高鐵香港段和蓮塘香園圍新陸路口岸），仲話這些基建可以縮短出行時間，拉近三地距離，形成粵港澳一小時生活圈的理想布局。冇錯，啲重大基建件件打造成本都要成千億元，若然配套足及安排周全，應可發揮其應有效益，可惜冇心冇肺冇靈魂嘅特衰政府，大事做不到，小事做不好，結果「與領導人同行」又如何？大橋開通以來亂象叢生，真係睇見都眼冤！
香港近年好似撞邪咁，交通幾乎日日出事，港鐵「四線齊冧」，有如一隻烏龜反肚四腳朝天，認真唔老利！難怪港鐵三日一小故，六日一大鑊，打工仔唔知要忍到幾時。
講開又講，啟德郵輪碼頭營運多年，平日乏人問津猶如死城，一有郵輪停靠，又因為接駁交通工具欠奉，搞到啲旅客「搭無車」，成千人等的士，認真醜出國際，香港已非「好客之都」，而係「趕客之城」。仲有啊，高鐵西九龍站又係亂象不絕，一時取票櫃位不足，一時自動售票機故障，搞到乘客要到櫃台購票，擔心嚟唔切上車，市民如果信政府宣傳高鐵如何快捷方便，往往就咁中伏！交通亂象無日無之，一眾廢官只會卸膊打官腔，不是「開通初期流量低係意料中事」，就是「需要了解和磨合」，搵着啲至叻語言偽術嘅廢官，香港唔死就奇！