政情：張翔只提創科 唔答港大人事問題
香港大學人事任命屢惹風波，該校法律學院院長及首席副校長目前懸空，全城關注新人事任命。剛上任約三個月嘅港大校長張翔尋日出席一個活動時，只係講香港要點樣創新，對於港大人事問題一概封口唔回應。
指港人畀框架框住怕犯錯
張翔尋日朝早同中文大學校長段崇智、科技大學校長史維一齊出席論壇，講及有關創科新發展。張翔話嚟咗香港幾個月，發現社會唔容許失敗，如果要創新就要接受有錯誤，係整個社會氣氛都要改變。佢又話香港人畀框架框住，好似推廣廉潔，令人擔心會犯錯，怕咗創新，希望將來可以有所突破。
討論完結後，張翔同多名出席論壇人士合照後離開，期間被問及係咪已確定內地法律學者、澳洲悉尼大學教授凌兵出任港大法律學院新院長，對於凌唔係來自普通法地區，係咪有能力出任院長一職，以至暫任首席副校長譚廣亨係咪會坐正等，張翔一概無回應，只係同傳媒邊揮手邊離開。