政情：借貿戰拓個人遊城市 鍾國斌食檸檬
中美貿易戰持續升溫，對香港經濟影響陸續浮現，近日更有指美國或考慮全面向華貨徵收關稅，立法會紡織及製衣界議員鍾國斌尋日就喺立法會問政府會唔會考慮新一輪個人遊城市，以保住香港嘅旅遊、餐飲同零售業，但係商務及經濟發展局副局長陳百里婉轉咁請咗佢食檸檬嘞！
陳百里：港需擴闊對外經貿聯繫
鍾國斌話若美國決定全面加大中國產品嘅關稅，明年嘅經濟狀況必定每況愈下、更為嚴峻，出口界將受沉重打擊，若然出口及物流業受影響會導致骨牌效應，零售、餐飲等行業均不能幸免，於是就問可唔可以開放新一輪個人遊嘅城市，帶動新旅客訪港。
陳百里回應時話開放新一輪個人遊城市有考慮因素，任何有助業界度過難題嘅做法都會考慮，而目前應對持續嘅中美貿易戰時，需要擴闊香港對外網絡及經貿聯繫，亦要鞏固同加強現有競爭力，希望有助業界共渡難關，又話政府知悉業界最擔憂明年唔夠訂單，未來會開拓東盟、中東同東歐市場，現時已有數名局長與業界赴日本開拓市場，冀望靠政府與政府層面幫助業界尋助更多訂單。咁即係暫時冇考慮開拓個人遊城市喇！