政情：張建宗公僕無休論 陳沛然即收申訴

小肥張出晒名鍾意返工，佢嘅名句包括「有得打呔就興奮」、「唔坐冷板凳就開心」，仲曾被爆早年試過放假離港就覺得身體不適，返港後有工開就即刻變得精神，佢做勞工及福利局局長九年，都未放過一日假，就連做咗政務司司長後，早前整親腳要戴腳托都繼續返工，甚至出席活動都唔想攞住個「退休」牌嚟影相，聽落真係好似一部工作機器咁。

陳指政府應帶頭保障員工

唔知佢係咪以為個個都同佢一樣，人生只有「返工」呢個興趣，喺施政報告發表後，小肥張曾經講過，公務員為咗份報告加班，甚至凌晨都會通電郵，仲話大家都好樂意咁做。

唔知小肥張係咪問得太少公務員，Pierre尋日就喺網誌出咗封信畀小肥張，提起小肥張嘅「公務員樂意凌晨通電郵」，令Pierre收到有公務員申訴，話咁樣係涉及職業健康問題。Pierre又批評政府作為香港最大嘅僱主，實應以身作則，保障員工喺收工時間有真正嘅私人同休息時間，問小肥張係咪認同添！

張曾話長工時唔值得推介

Pierre又話早前喺《全球競爭力報告》中，香港就「勞工權益」攞零分，另一項調查發現，香港係全球工時最長嘅城市，每周平均工時超過五十小時，比全球的平均工時多三成八咁話喎。

講真嗰句，可能小肥張冇乜考慮過，自己作為上司，問到下屬係咪願意凌晨覆電郵時，未必有好多人肯同佢講真話，加上自己太全程投入工作，先會以為大家都樂意凌晨收午夜凶鈴。其實小肥張以往都講過，長工時係唔值得推介嘅，下次見到下屬凌晨仲覆電郵時，都應該提醒下屬要多休息啦！