中環出更：陳健波被提不信任動議 擬審「明日大嶼」撥款前處理
被指造價逾萬億港元嘅「明日大嶼」填海計劃備受爭議，立法會財務委員會主席陳健波近日指反對計劃嘅人士係「歷史罪人」，惹來公民黨郭家麒對佢提出不信任動議。陳健波尋日回覆話喺可行情況下，會喺審議「明日大嶼」撥款前，舉行特別會議處理有關嘅不信任議案。
有權決定何時討論 被斥荒謬
陳健波喺信件中指出，經考慮多個因素後，認為包括本周五在內已編定財委會例會同應政府要求加開嘅會議，都應該預留作專門處理政府提交嘅撥款建議，已指示秘書處盡快安排特別會議處理有關議案。
另一民主派議員尋日亦去信內務委員會，要求喺立法會大會上就陳健波今次事件提出休會辯論，但佢尋日已收到內會回覆指不獲批，理由係內容關乎財會主席主持會議嘅安排同相關程序，並唔屬於政府負責的事宜。該泛民議員批評是匪夷所思、玩弄《議事規則》，指目前只能喺財會提出不信任動議，但陳健波作為事件主角，卻有權力決定何時討論其不信任動議，情況荒謬。
內會主席指該名議員嘅言論不符事實，強調財會同內會並冇從屬關係，故財會或其他委員會主席言行、處事方法均非內會嘅工作範圍，強調自己不批准休會待續議案係符合《議事規則》。
卓妮