中環出更：瞓兩粒鐘趕返港 沈慧林演講反應慢
細個讀書時，有啲老師會教演講技巧，但投身社會後，又有幾多人經常都有演講嘅機會？香港鍾表業總會副主席沈慧林（William）就係其中一個，好似早排全港各區工商聯、油尖旺工商聯會合辦咗一個「與CEO對話」嘅活動，就搵咗William作為其中一個演講嘉賓，不過眼見佢當日狀態好似麻麻哋，唔單止唔係好精神，直頭反應有啲慢喎。開場前影相嘅時候，其他人話要一齊畀個「Like」嘅手勢，點知William一啲反應都冇，到影完先後知後覺舉番隻手出嚟，唔通佢太緊張？
原來William喺演講前一日仲喺北京傾緊生意，傾到成夜晚十二點幾，返到酒店梳洗、執行李都已經兩點嘞，但為咗趕朝早機返港，四點就要起身，所以只係瞓咗兩個鐘咋！難怪佢有啲失魂，但佢話習慣咗呢種生活節奏，有時忙起上嚟真係冇得休息，好彩當日演講內容之前都有講過，所以都仲應付到。
繆家濤話好少講政治話題
香港貿易發展局設計、營銷、品牌授權顧問繆家濤（Karl）係活動搞手之一，雖然佢今次冇親自落場演講，但其實佢都經常代表貿發局去演講，而且唔止喺香港，仲會去內地、東南亞地區演講，對象主要都係年輕人。不過近年成日都有人話年輕人愈嚟愈激進，唔知Karl有冇遇過一啲年輕人故意刁難佢，問啲好偏激嘅問題？佢就話冇喇，事關佢好少講政治話題，主要都係講一啲專業知識、經濟發展相關，話呢類題目年輕人都會好感興趣，而且佢都係旨在畀年輕人認識多啲啫！
油尖旺工商聯會會長黃達強同該會主席冼慧詩都喺度，仲話該會經常都會舉辦呢類演講，事關年輕人好少機會同成功人士接觸，希望透過呢啲活動擴闊年輕人眼光，等佢哋揀科時可以參考。而講者之一嘅香港餐飲聯業協會青年委員會副主席李祉鍵就話好少公開演講，唔知佢會唔會怯場？佢話雖然少公開講，但公司都有類似場合嘅，加上佢準備充足，所以唔擔心會有問題。
卓妮