港珠澳大橋尋日正式通車，呢項國家級基建被譽為世界新七大奇景之一，本來中國人係與有榮焉。可惜吖，大橋開工以來一波三折，事故不斷，早有「奈何橋」之譏，首日通車又鬧出唔少笑話，簡直醜上加醜，唔少旅客乘興而來敗興而返，都唔知咁急通車為乜。
嗱，搵食車司機食鹽多過你食米，大橋配套掂唔掂，佢哋一試就知龍與鳳。有的士司機鬧爆香港口岸落客指示唔清晰，例如接客去香港口岸，需駛上行車橋到旅檢大樓出境樓層落客，若然直接駛去大樓地下落客就會違規，直頭靠害。更磨人嘅係，抵達旅檢大樓前有分岔位「撳飛」決定上落客，選錯咗就要兜大圈重新嚟過，費時失事，結果搞到唔少司機大佬同大橋職員霎氣，簡直大整蠱。仲有呀，人工島出現保安漏洞，禁區嘅鐵絲圍網圍啲唔圍啲，想偷雞闖禁區話都冇咁易。
香港已經一片混亂，澳門亦係一擔擔。記者視察發現，澳門口岸處處爛地，塵土飛揚，工人正埋頭苦幹趕工，證明配套根本未準備好。好似旅檢大樓咁吖，公共電話未安裝，郵局未啟用，連大樓內商場都空空如也，旅客好似去咗鬼域咁款。最好笑係巴士站嘅指示牌非常細小，唔清楚都算喇，港澳跨境巴士上車點嘅標示竟然只用影印紙版本頂檔，有冇再兒戲啲吖。
珠海又點呢？由於大橋早上九點正式通車，唔少市民紛紛預訂最早一班專線旅遊巴搶先體驗，殊不知珠海口岸九點先至開放通關，旅客根本配合唔到首班接駁巴士，狼狽不堪，有自駕遊旅客仲要喺大橋倒車等到夠鐘先可以駛入，場面亂過亂世佳人。至於巴士拋錨、入境櫃位塞爆、地下停車場綠化工程未完成，求其搵塊綠色膠氈蓋住、洗手間牆上告示用膠紙固定等蝦碌場面，更係多不勝數，唔知好嬲定好笑。
都仲未講最多人投訴嘅直通車購票安排，三地各有各問題，唔接受現金有之、冇實體櫃位要自行上網訂票又有之，總之就係要幾不便有幾不便，難怪尋日人車皆唔多見，首日只有二千多車次過橋，不及預期最低流量四分之一，有專家估計冇十年都唔使旨意達標，都咪話唔大鑊。
真係諗極唔明，大橋配套設施明顯未Ready，咁都要趕住通車，同獻醜有乜分別？唔通推遲一個月唔得咩？就算推遲廿日都好過家陣裙拉褲甩吖。冇計嘞，舢舨充炮艇，打腫臉充胖子，中國人向來好大喜功兼形式主義，港珠澳大橋動工期間醜聞多多，通車再鬧笑話，睇嚟真係蝨多不癢咯。