政情：邵家臻唔開心 食舒肝藥醫濕疹
最近開始踏入秋天，天氣時凍時熱，唔少濕疹患者都好頭痕，會搵唔同方法去紓緩，例如戒口、搽藥膏等等，患有濕疹嘅立法會議員邵家臻最近就選擇咗睇中醫，仲食緊啲「舒肝」嘅藥粉調理吓添！「舒肝」同「輸乾」讀音咁似，聽落似乎唔太吉利喎！
復會工作多 肝鬱上火
濕疹好難斷尾，喺轉天氣期間更加會容易發作，嚴重嘅患者會因為太痕而失眠，甚至影響工作。邵家臻近日睇中醫，佢就引述醫生話佢「肝鬱上火」，依家個肝臟憂鬱、唔開心，所以搞到好燥熱，容易令濕疹發作。佢仲透露，醫師勸佢要開心啲，以免病情惡化。
最近立法會復會，面對排山倒海嘅工作，難免會搞到冇乜時間休息，加上依家個社會環境，邵家臻大呻「咁樣點會開心」喎。不過佢就話，醫師知佢係議員，明白佢嘅處境，所以除咗勸佢開心啲之外，仲開咗啲「舒肝」嘅藥粉畀佢調理，希望可以紓緩鬱躁喇！