政情：立會停自選湯麵服務 張宇人：改去咖啡角
今個立法會年度已經開始，議員又要展開成日留喺大樓內打躉嘅日子，所以大樓內嘅餐飲服務又變得好重要。不過，尋日立法會秘書處通知，因為需求低，所以由新立法年度開始，立法會宴會廳原本逢開大會日子，喺傍晚時分提供嘅自選麵服務會停止。飲食界議員張宇人聽到消息之後，都問係咪少人食，睇嚟口碑真係麻麻喎！
話每人口味唔同
講開食嘢，作為飲食業代表嘅佢自然有番咁上下要求，仲口快快話以往成日唔記得自己帶麵餅畀佢哋煮喎，唔通啲麵真係咁唔好食？佢就話呢項自選麵服務都OK嘅，只係每個人嘅口味唔同，好似梘水味重唔重、麵質爽唔爽等，真係好講究。而日後開會時想食麵，佢話就要改去大樓五樓嘅咖啡角，但啲麵都係同自選服務嘅一樣喎，唔知到時又啱唔啱佢胃口呢？