政情：風水輪流轉 補飛入工務小組 峯鴿嘗受審滋味
適逢立法會進入新一年度，議員都要重新申請加入事務委員會，但咁多個會，有時走漏眼都好正常，而且議員即使逾期加入，多數都會獲開綠燈放行。但涉嫌喺立法會大樓內搶保安局女行政主任手機嘅民主黨立法會議員許智峯（峯鴿）就冇咁好彩喇，事關佢尋日打算申請加入工務小組時，就被建築、測量及都市規劃界議員謝偉銓（Tony）阻撓，要求佢親身解釋之餘，仲話要記名投票添。
同上屆張華峰情況相似
芸芸逾期加入申請嘅個案當中，最經典就係上屆嘅工務小組喇。當時由於建制同泛民關係麻麻，泛民又成功突襲，搞到十幾個建制派議員即刻補飛申請加入，但最後只得三人獲批。其中獲批嘅金融服務界張華峰（肥老闆），喺會議上仲畀泛民瘋狂審問添。正所謂「風水輪流轉」，今次就到泛民承受惡果喇！
峯鴿喺上星期二已經去信解釋，話小組委員會負責審批政府提交嘅公共開支建議，備受關注，所以希望加入。不過Tony似乎唔太滿意，尋日開會時就話希望佢詳細解釋原因，仲話覺得咁樣會公道啲。由於當時峯鴿不在席，所以盧偉國就決定押後處理。
唔少泛民即刻幫口，仲批評有議員選副主席時直頭冇影，但建制派都繼續投票，建議應該先投票處理，再叫峯鴿後補理由。與此同時，有建制派就講番肥老闆嘅經歷，仲話嗰時做法已經係先例。
放行與否 建制未有共識
峯鴿喺會議接近尾聲時現身，指喺報名階段時，因為會議時間同其他工作撞咗，所以冇申請加入，但後來搞掂咗，故此提出申請。但Tony質疑佢係咪覺得工務小組相對冇咁重要，仲要求喺下次會議上投票處理。咁到底最終會唔會開綠燈，到依家建制派都未有共識，有人揚言會問問題，亦有人覺得應該要放行。所以峯鴿入唔入到，都仲係未知之數。
同樣大頭蝦嘅仲有民建聯嘅葛珮帆，佢就遲咗加入衞生事務委員會。今次峯鴿被阻，唔知一眾泛民會唔會反擊呢？