中環出更：小明出新歌雙語宣揚防詐騙
電話騙案屢禁不止，唔少高學歷人士都中招，當中有唔少係喺本港大學就讀嘅內地生。早前喺一個場合見到外號「小明」嘅兒科醫生李家仁，佢話計劃出新歌提醒大家防止詐騙，歌詞仲要有埋粵語同普通話添！
小明嘅創作靈感都好緊貼社會時事，佢笑笑口話，出街時有唔少長者同佢打招呼，所以都計劃推出一首耆英歌，但要先解決老人家唔上網嘅問題喎。另外，佢亦好關心環保，特別係近期熱議嘅減用塑膠飲筒問題，佢認為要杜絕需先尋找替代品，好似聚乳酸飲管就能夠天然降解，不過成本較塑膠高，相信比較少商店肯用，大嘆環保路難行囉！
當晚係仁愛堂舉辦以夜上海為主題嘅華麗金曲慈善夜，唔少人都悉心打扮配合主題，包括仁愛堂主席羅台秦、總理陳映彤、吳惠玲同饒亮賢等。羅台秦話，揀呢個作主題係因為當年中西文化匯聚上海，當中不乏創新精神值得學習咁話。
饒亮賢《上海灘》Look登場
饒亮賢以一身《上海灘》造型示人，夠晒經典，佢話因為呢齣電視劇深入民心，一講起夜上海自然諗到要戴帽配長圍巾喇。佢不時要去上海公幹，覺得依家上海人打扮比香港人仲時髦，因為當地經濟同生活改善，而且有不少國際品牌進駐，所以成個城市變得有活力同魅力。
陳映彤亦有喺上海投資，佢就認為上海比香港更國際化，依家已有能力直接同外國聯繫，未必再需要香港作為橋樑。而且內地教育視野較闊，又匯聚咗國內各地嘅人才，直言香港人要自強先得喇。
卓妮