一個城市嘅盛衰有迹可尋，一間大學何嘗唔係一樣。香港大學向來係全港首屈一指嘅最高學府，家長都以子女成為港大門生為榮，可惜吖，近年港大不思進取，師生一味沉迷政治鬥爭，幾厚嘅底子都有敗清光嘅一日喇。
嗱，英國《泰晤士高等教育》公布世界大學四個學科嘅本年度排名，結果不出所料，港大法律學科嘅排名仆到直一直，唔止由去年嘅十八位跌落廿二位，二十大不保，就連亞洲一哥嘅美名都被澳洲墨爾本大學搶走。仲有吖，老對手新加坡國立大學以前唔係港大嗰皮，家陣就以一位之差爬頭，問你醜唔醜。至於商業及經濟學科，科大本來最耍家，點知亞洲排名亦由一哥變成老三，被新加坡及內地超越。
香港嘅大學排名係咁跌，唔係冇原因嘅，一來逆水行舟、不進則退；二來師不師、生不生，有書唔讀，有研究唔做，整日醉心街頭，點會有好成績吖。就連調查機構都忍唔住開聲，話排名結果反映內地大學水平迅速攀升，建議香港專注改善教學環境及業內聯繫喎。講白啲，咪即係警告香港各大學如果繼續不務正業，遲早被世界淘汰囉。
冇計嘞，自從佔中開始，各大學就成為反中亂港大本營，港大更加係「一哥」，黑金入侵校園不特止，法律學者戴妖仲知法犯法，誤人子弟，不斷以「違法達義」、「不守法不等於不尊重法治」嘅歪理荼毒學生，搞到社會都無日安寧。大家應該記得，年前港大委任副校長鬧到沸沸揚揚，仲搞出衝擊校委會呢場大龍鳳。至於旺暴推手梁天琦係港大學生、港大學生刊物《學苑》最先宣揚港獨等等，鑊鑊新鮮鑊鑊甘。最弊呢股歪風吹遍學界，其他大學有樣學樣，大學生郁啲暴力衝擊、郁啲批鬥師長、郁啲佔領校園，真係唔得佢哋死。
上樑不正，下樑必歪。港大法律學科質素固然泥沙俱下，香港司法界一樣污濁不堪。就講東方報業記者遭壹淫媒漢奸黎爆粗恐嚇呢單畸士吖，律政司拖延逾十六個月都唔肯告、唔敢做，擺明姑息養奸；反觀無權無勢嘅小市民就冇咁好彩咯，涉及一蚊幾毫嘅案件都告到你甩褲，呢啲咪係同人唔同命囉，鬼叫你冇外部勢力撐腰咩。
都係嗰句喇，人哋一心一意謀發展，香港就專心致志搞鬥爭，點會有前途o架。所以呢，唔該各大學知恥近乎勇，提高學術質素，重振校綱，縱容老師學生不務正業，最終只會自食惡果嘅咋。至於律政司咯喎，講乜都係嘥氣，一日唔將漢奸黎落鑊，司法一日都唔會有真正公平正義！