政情：公民講場：配套不足大嶼人工島養豬？

施政報告提出「明日大嶼」計劃預計要揈五千億元建造人工島，激起公憤。發展局局長黃偉綸尋日繼續為呢個「倒錢落海」嘅計劃辯護，但反對填海計劃嘅天文台前台長林超英直指呢個係建造容納逾百萬人社群嘅計劃，擔心孤島生活「慘過天水圍」，又一再重申，如果必須建島則要以人為本，否則人工島同豬場養豬無分別。話時話，由於初期缺乏支援，天水圍曾發生多宗倫常慘劇，更被稱為「悲情城市」，依家政府強推「明日大嶼」計劃，如果冇深思熟慮同做好配套嘅話，等如再炮製第二個悲情城市出嚟，試問點對得住香港人。