政情：麥德正帶鬼古團冇試過撞鬼
早兩年遊戲Pokémon Go熱潮興起時，有區議員趁機搞導賞團，不過若以鬼古為主題，大家又有冇興趣呢？喺殖民地時期，作為軍事重地嘅灣仔區，同時亦曾係日軍重點駐守地方，所以一向予人感覺好猛鬼。喺灣仔長大嘅東區區議員麥德正，原來喺區內已有十幾年帶鬼古導賞團嘅經驗，最高峰試過帶六、七十人嘅團，但佢帶咗十幾年鬼古團，都未試過撞鬼。
灣仔出晒名多鬼熱點，麥德正話星街以前係防空洞，喺戰爭時期畀炸彈炸過，死傷無數，所以最猛鬼，仲透露唔少團友去到星街就走，有啲感應到靈界嘅團友就嗌頭痛，甚至感覺周身唔聚財。原來修頓球場都好猛鬼，佢話嗰度都曾被炸彈炸過，當時唔少屍體仲埋喺炸彈坑添！
佢自細對古靈精怪嘢有興趣，以前去英國做嘢時喺愛丁堡參加過鬼古導賞團，導賞員仲講埋歷史故事，希望參加者了解當地文化同埋吸取歷史教訓，所以佢都有樣學樣，透過呢種方式去保育社區傳說。臨近萬聖節，佢原本都想順應街坊要求搞番團，可惜工作太忙，所以就要等吓喇！