政情：大欖轉車站建貨櫃廁所 朱凱廸：點都好過依家
唔少住喺新界西嘅市民每日都要出市區返工，大欖隧道轉車站係其中一個重要嘅交通交匯處，但係廁所就臭名遠播，唔少市民都投訴轉車站嘅臨時廁所非常污糟，情況惡劣到完全唔敢用，立法會議員朱凱廸早排亦都親身視察過，確實係非常難頂，所以佢都隨即搵政府部門搞搞佢，而政府最近終於定咗短、中、長期嘅改善方案喇！
料明年實施
短期方面，首先廁所數量由二變四，每日清潔次數則由二變三，下個月開始仲有駐場廁所工人添；中期就會研究設置「貨櫃廁所」，政府亦已經落場睇過，認為技術上可行，預計今年底落實有關安排，明年實施；長期就當然係整番個公共廁所啦！不過選址、撥地安排等細節都仲要傾。究竟廁所之後係咪唔再臭？朱凱廸都唔敢寫包單，只係話點都好過依家啩！但到底係咪真係咁有成效，可能都要等到實施後先至知道喇！