政情：黃錦星開專頁講環保 唐文龍大鬧打對台

變身特警責大嘥鬼唔環保

黃錦星以往都係用個人帳戶推廣環保，但可能唔太方便，所以開番個人專頁。尋日正式開通後，頭炮貼文就上載短片，佢再戴黑超變特警怪責大嘥鬼唔夠環保，派佢去搵環保之友取經，包括成日同佢鬥用得少電嘅天文台前台長林超英、喺大帽山經營茶水亭嘅蓮姐等。

而喺片尾時就見到唐文龍氣沖沖去搵黃錦星，一開口就問責咁問「點解你要咁做？」嚇到黃口窒窒問乜嘢事？唐就話黃開專頁專講環保擺明同佢打對台，黃就安撫對方一齊為環保出力唔好咁計較，兩人和好一齊用手做出代表環保嘅三角循環自拍添。查實大家都係為環保，唔使咁勞氣爭粉絲嘅。