政情：三局長齊訪葵青區會 陳肇始勢成炮灰

舊年嘅施政報告公布葵青區地區康健中心試點計劃，據悉中心已選址於葵涌九龍貿易中心，預計明年第三季投入服務，現正進行招標工作。咁呢項政策係由食衞局負責，當工作推展得如火如荼之際，好應該落區同區議員傾吓偈嘅，而中心掹車邊都算係基層福利，同勞福局有些少關係，但民政局就有啲唔太關事喎。

滅蚊不力 鼠患賴山竹

據了解，區議會秘書處喺上周五向全體區議員發信，預告三位局長會喺下月十三日到訪區議會，仲叫大家寫低想同三局長表達乜嘢意見，交畀秘書處轉達局方以準備定答案。但以往甚少三局長一齊行動，大部分區議員都覺得驚訝，有傳三局長可能會先實地視察康健中心選址再同議員會面，但唔少區議員亦準備緊追問各局不同政策問題，當中絕大部分同食衞局有關，再加埋之前滅蚊不力，爆登革熱，同埋鼠患賴超強颱風山竹，做得咁差，睇嚟到時陳肇始勢成炮灰。

葵青區議員黃潤達話，同其他民主派區議員醞釀緊當日有乜嘢行動。另一名區議員徐曉杰就笑言，佢都好想知點解會三位局長一齊落區，將會追問勞福局有關傭工問題，另要求食衞局擴大禁煙區至所有主要道路。區議員林紹輝就要求食衞局交代，點解唔畀市民喺垃圾站門口放大型垃圾，搞到屋邨內垃圾遍地開花；區議員周偉雄就要食衞局短期內改善基層牙科服務，在康健中心研究提供婦科檢查，更要求當局妥善處理區內鼠患問題等。

試過推徐德義做箭靶

咁多問題都係針對食衞局，睇嚟陳肇始當日有排受，唔知係咪驚會變箭靶，專登叫埋劉江華同羅致光陪同幫手擋吓箭呢？仲記得今年四月，陳肇始本來單拖落黃大仙區議會，但當知道多名區議員會狙擊表達對重建聖母醫院嘅不滿時，佢竟然甩底要副局長徐德義頂上，徐德義變咗箭靶，畀班人鬧到體無完膚，希望呢次陳肇始唔好重蹈覆轍嘞！