中環出更：小一收生標準愈來愈高 楊華勇帶囡囡面試有壓力
好嘅學校永遠都咁多人爭，依家學校收生標準愈嚟愈高，令到唔少家長都要諗盡方法點樣幫小朋友考到入心儀嘅學校。卓妮近日喺香港福建社團聯會（聯會）會董就職禮上，見到副主席楊華勇，佢話大女兒已經五歲，近日幫佢報咗幾間直資學校，佢同太太孖住一齊帶女兒去面試，女兒有時都會緊張，佢本身有學啲音樂同體育，包括彈琴同打敲擊樂，亦都識得游水同打波，亦都有加咗去唔同地方旅行嘅相，而作為爸爸嘅佢坦言都有啲壓力o架！
講起子女教育，原來香港中華廠商聯合會吳宏斌嘅孫仔孫女，個個都讀名校。佢話十二歲嘅外孫仔派咗第一志願，入咗九龍華仁書院，中一已經開學啦，唔使周圍撲學校，真係安樂晒，開心到個孫瞓唔着咁滯。佢話孫仔都OK，原本去咗兩、三間直資學校面試，但得好少位，所以冇收佢。
洪為民囝囝大學讀歷史經濟
吳宏斌又講起，其實佢有兩個孫女，一個自行派位入咗瑪利諾，一個就入咗聖保祿天主教小學，仲幫埋佢哋嘅妹妹考入去容易啲添！
至於聯會另一名副主席洪為民就話佢個仔以前係讀國際學校，當年見到小學唔使考試，佢都問過老師咁點畀分，老師就話「你日日都睇住佢，點會畀唔到分呀」，依家兒子已經入咗大學，原本想讀法律，但佢就勸兒子應該先讀基礎學術嘅嘢，之後再讀專業，因為專業係技巧，可以訓練到出嚟，最終阿仔就揀咗讀歷史同經濟。
講番今次就職禮，原本做主席嘅吳良好，交畀吳換炎做主席，兩個都係姓吳，真係有緣分！吳換炎話，同吳良好已經識咗十幾廿年（口架）啦，而吳良好就話聯會無論交畀邊個都會做得好，因為呢個係傳統嚟。
卓妮