職場健康：吸煙致慢阻肺病併發多礙工作
在疾病大會會場，各疾病代表正爭辯誰對人類工作影響程度較大，談到肺部疾病時候，一個代表突然站出來。主持人： 「呢位兄台好似好有信心咁喎，敢問閣下高姓大名？」
慢性阻塞性肺病： 「好話啦，我就係人見人怕嘅慢性阻塞性肺病，簡稱慢阻肺病。我係一種會持續惡化嘅慢性呼吸道疾病，令患者氣管因發炎而扭曲同失去正常肺組織嘅支持變得狹窄，加上氣管壁增厚同腫脹，氣管道分泌增加，空氣進出呼吸道受阻，導致呼吸困難。問你怕未？」主持人： 「聽落去好堅喎，講吓你點樣影響人類工作先？」
慢阻肺病： 「聽清楚啦，雖然患者初期徵狀可能較輕微，但如可以受到控制同保持穩定，一般唔會影響工作。但係，當患者病情轉壞及出現併發症，例如持續惡化同引致多種併發症如肺炎、氣胸及心臟衰竭等，就會影響佢哋工作能力。會惹到我通常都有不同成因，例如吸煙、工作長時間暴露喺有大量有害物質環境、空氣污染同埋遺傳因素等，但吸煙是招惹我嘅主因，長期吸入二手煙都會。」
暫未有根治方法
主持人：「咁你咪好犀利，不過據我所知，雖然目前為止仲未可以根治你，但如果患者保持健康生活方式，配合有效治療及康復計劃，就可延緩併發症出現，保持健康狀態以應付工作需要。」慢阻肺病： 「咦，你咁了解我，唔通你暗戀咗我好耐？ 」
職業安全健康局
www.oshc.org.hk