上樓難水浸眼眉 說填海畫餅充飢

講多無謂，數字最實際，居屋尋日截止接受申請，房署估計收表數量打破歷年紀錄，預計近六十人爭一個單位，都咪話唔誇張。上樓大軍，家家有本難唸的經，其中有對情侶嘅畸士，聽到人眼都濕埋。佢哋話計劃出年結婚，如果今次抽居屋落空，生仔計劃就會hold住先。幾十年前唱「貧賤拗頸多，生仔都諗過，阿女嗌肚餓，屋租都要拖」，估唔到幾十年後社會依然原地踏步。高官開口埋口「高齡海嘯」，郁吓叫人「生三個」，如果肯多啲落區接吓地氣，聽吓市民心聲，相信唔會咁口響。

講到呢度，大家應該明白點解特衰政府公布「明日大嶼」大型填海計劃，當堂畀人鬧到體無完膚。好簡單啫，無殼蝸牛等上樓水浸眼眉，你走去同佢描繪十幾年後嘅美好願景，同畫餅充飢冇咩分別。花大錢辦得成大事都仲話，最怕係好似杜拜人工島咁，淪為世紀級爛尾工程，到其時儲備一鋪清袋敗清光，林鄭早就拍拍籮柚，告老還鄉含飴弄孫，條數同邊個追！

家陣最令人𢱑爆頭嘅係，明明「土地大辯論」啱啱結束，連報告都未交，點解港府急不及待sell人工島計劃？就連土地供應專責小組主席黃遠輝都同政府劃清界線，話對填海數量突然大增「感到詫異同失望」。畫公仔唔使畫出腸，港府玩假諮詢早有前科，之前全民退保諮詢借學者過橋，今次斷估又係故技重施，係人見過鬼都怕黑。

嗱，高官對填海造島情有獨鍾，仲要唔貴唔搞，到底係咪好似有啲人所講要「掏空」香港，為下屆政府「埋地雷」，要問過佢哋至知，大家眼見嘅係，香港明明有地可用，短期內可以增加大量房屋供應，點解當局係都要捨近求遠？唔講遍布港九嘅空置校舍同公務員宿舍，淨係講粉嶺高爾夫球場，佔地一百七十公頃，可以為廿幾萬市民提供安樂窩，偏偏廿幾萬人嘅住屋需要，就係比唔上二千幾個大孖沙高球會員嘅休閒特權。對於社會各界要求收回球場興建公屋，高官睬你都有味，反而向弱勢群體埋手，毀人家園就鬼咁積極，呢啲唔係欺軟怕硬、嫌貧愛富又係乜呀！

始終都係呢句︰不患寡而患不均，新加坡填海造地之所以咁成功，就係因為人哋敢於動權貴嘅奶酪，高球場一樣要「為國犧牲」，市民條氣順啲，阻力自然細啲，好心香港班廢官學吓嘢喇！