政情：民協民望插水 街工跌出十大政團
香港大學民意研究計劃公布最新「十大政治團體」認知度及評分排名，但首十位嘅評分都喺五十分以下，大多數泛民政黨嘅評分均下跌，而近來受到元老退出影響嘅民協評分跌幅最大，就由上次排第三，急跌至排第八位，而立法會議員梁耀忠所屬嘅街工更跌出榜外。
泛民政黨評分多下跌
今次調查分兩輪進行，首輪為上月中下旬進行認知率排名調查，第二輪就係今個月二至四日嘅支持度評分調查。結果顯示，首三位分別係工聯會、公民黨同自由黨，而民協得四十一點四分排第八，較上次評分下跌三點二分，社民連的評分亦下跌二點一分，跌至三十八點二分，人民力量同工黨均下跌○點九分，而早前捲入勞工組風波引發退黨潮嘅街工，雖然有四十四點七分，但由於認知率較低而被剔除出十大之中。
由評分升跌可見，睇嚟都係受到冇咗元老級前輩助陣影響，將來會點就要睇吓後一輩嘅造化喇！唔知現任主席施德來有乜板斧呢？