政情：麥肇敬夾Band二創 教大眾食得健康
醫生一直叫大家食少啲鹽同糖，大家幾時有聽從過？於是一班夾開Band嘅醫生就將逆耳忠言化為旋律音符，將Beyond經典作品《不再猶豫》改編為《不再油鹽》，開首第一句就唱出你我心聲：「從前食嘢愛油鹽，食到超標不太掂」，琅琅上口又洗腦，歌詞中仲教埋大家點樣唔落鹽糖但又唔會食到口寡寡添！
改編Beyond歌曲《不再猶豫》
香港公共醫療醫生協會會長麥肇敬同五位聖約翰救傷隊嘅醫生夾開Band，大家喺今年八月時開始構思，諗吓點樣透過歌聲鼓勵大家食得健康，忽發奇想覺得《不再猶豫》呢首歌嘅歌名同旋律好啱用嚟改編。如果大家想預防三高，兼且「驟眼腹肌多兩舊」，首歌就叫大家「欲撇甩三高清清淡淡先至好，若覺得口寡加葱蒜落吓醋。」
呢首歌嘅MV拍到同專業樂隊有得揮，初版喺網上出咗兩日已有兩萬名網民觀看，喺社交平台攞到唔少「like」。MV尋日正式登陸「全城減鹽減糖」Facebook專頁嘞！咪以為二次創作好易，擔任結他手同有份填詞嘅麥醫生話要夾到全部人練歌簡直難過登天，佢哋前後只係練咗三次，錄MV嗰日由收工後七點錄到凌晨一點，之後仲要繼續返工，但佢笑笑口話：「醫生時常on shift、overnight」，OT一晚無難度啦！