政情：建制爭相退會 廖長江走最快

人力事務委員會成重災區

成為退會重災區嘅人力事務委員會，嚟緊要處理嘅爭議議題都唔少，包括強積金對沖、最低工資同標準工時等等，不過建制派唔同陣營就似乎唔太重視，例如六人組中就有三人退出，包括廖長江、陳振英同陳健波；民建聯（民記）甚至有五人跳船，包括陳克勤、何俊賢、柯創盛、梁志祥同周浩鼎；至於工聯會麥美娟同新民黨容海恩亦以公務調動等為理由退出。

雖然大批建制派議員退出，但人力事務委員會剩低嘅二十八人，建制派仍佔咗近七成共十九人，繼續穩佔人數優勢。至於建制派唔肯讓出主席之位嘅司法及法律事務委員會，亦有七人退會，不過建制派喺會上仍然以二十一比八佔明顯人數優勢。另外，教育事務委員會亦有五人退會。

廖退會速度數量「領先」盟友

目前參與建制派退會潮的十八名議員當中，功能組別佔咗九人，地區直選有七人，不相伯仲；不過討論房屋議題嘅房屋事務委員會，似乎就唔太獲功能界別議員垂青，退出嘅三人分別係廖長江、何俊賢同勞工界陸頌雄。以黨派計，暫時最多人跳船嘅係民記，多達七人有份退會，其中何俊賢同柯創盛都退出咗三個委員會。

不過講到「閃人」速度最快，就非建制派班長廖長江莫屬，佢喺復會後唔夠一星期已經退出咗四個事務委員會，退會速度「領先」一眾建制派盟友。廖長江閃得咁快，莫非佢係想以身作則，為建制盟友退會做個榜樣？