中環出更：基層慳儉助人精神 激勵黃國權送暖
香港人樂善好施，就算受助嘅基層人士都一樣有顆慈悲心。早前愛心飯團舉行慈善晚宴暨創會就職典禮，會長黃國權（Danny）就話，佢四年前開始喺位於旺角同深水埗交界嘅公司門口派飯，愈派愈起勁，係因為見到好多感人故事。其中一位受助女街坊用咗半年時間儲夠六百元，都要交畀佢買飯盒派畀有需要人士，呢份愛嘅精神感染咗所有義工同埋街坊，亦令佢更有動力繼續送暖行動。
Danny話呢位叫做阿嫻嘅女街坊同九十幾歲嘅媽媽同住，佢經常嚟排隊攞飯。有日阿嫻突然攞三百元畀佢話想幫人，Danny唔想收，就以啲錢唔夠買嘢為藉口婉拒。點知幾個月後，阿嫻又攞六百蚊嚟，話今次夠買喇！Danny唔忍心再拒絕，於是收咗錢，後來由街坊處得知，原來阿嫻儲咗足足半年先有六百蚊，媽媽仲同佢嘈交，因為媽媽想買一對鞋。Danny知道後好大感觸，於是買咗對鞋送畀嫻媽。當日呢對母女都有現身分享，現場掌聲不斷，氣氛感人。
李文偉盼增人手跨區派愛心飯
當晚有好多政商界人士出席，包括立法會醫學界前議員「怪醫」梁家騮。卸任議員兩年幾，怪醫已甚少出現公開場合，佢笑稱依家專心行醫同埋陪屋企人。見佢狀甚輕鬆，個樣都變得後生咗，原來係甩掉戴咗多年嘅眼鏡，改為戴隱形眼鏡，睇嚟都幾貪靚喎。
香港貴金屬同業協會會長李文偉同太太嚴偉貞都喺度，李文偉係晚宴籌委會主席，亦係愛心飯團永遠名譽會長，佢話四年來已累計派咗十三萬個飯盒，希望將來搵多啲義工同資源，跨區為有需要嘅人派更多愛心飯。
卓妮