政情：吳文華學打鼓 圓陳年少女夢
立法會前秘書長吳文華（Pauline）退休後生活多姿多采，早前取得人生首個學士學位，今個月底就會專程飛去澳洲參加畢業禮。最近佢又有新搞作，就係正式同老師學打鼓。唔講唔知，原來少女Pauline係個Band友，鍾意唱歌、彈結他，都試過打鼓，但係唔識玩花款，所以就許下呢個願望，依家終於實現喇。
Pauline笑笑口話，當年夾Band時個個都想唱歌、彈結他，冇人打鼓，咁啱有同學因為父母唔畀學打鼓，於是就將成套鼓送畀佢。Pauline學咗一排，但係就冇再深造。最近佢聽講打鼓可以防止腦退化症，於是的起心肝去學。
課餘用枕頭練節奏
上咗第一堂，老師已讚佢節奏感好好，即刻教佢玩花式。課餘時間，佢就喺屋企用枕頭練習，志在練吓個節奏。睇嚟Pauline真係有啲音樂天分喎！