政情：八網難逃：右膝傷完又變獨眼 蕭偉強自嘲「混障」
勞工及福利局前局長蕭偉強突變「獨眼龍」！話說蕭去年中離開官場後，已較少出席公開場合，佢最近於社交網站交代最新近況，原來佢繼去年左眼做手術後，較早時間又做右眼手術，連同前兩年右膝捱刀，自嘲係一名「混障」，即涉及視障及肢體殘障。
料會「退隱江湖」四星期
蕭偉強自嘲「混障」言論一出，即時引起唔少朋友及網民留言，有人笑問蕭「食番碟混醬腸粉未呀？」另有網民溫馨提示蕭暫時做住獨眼俠，唔好周圍去闖蕩江湖。
對於朋友及網民嘅關心，蕭應該收到晒，並於其中一個回覆留言承認要暫時退隱江湖四個星期，換言之，蕭或要到十一月先可望告別「獨眼龍」造型喇。