政情：棘手草案待拆彈 聶德權黃錦星有排煩

國歌法及垃圾收費爭議多

根據政府提交畀立法會嘅議程，立法會上半年會提交十三條條例草案，下半年就有九條。而二十二條條例草案中，負責得最多嘅就係財經事務及庫務局同運輸及房屋局，分別有五條同四條草案。而運房局嘅四條草案就包括預計上半年審議有關引入專營的士服務設立規管制度嘅條例草案，以及下半年審議嘅修訂《差餉條例》以向空置嘅一手私人住宅單位徵收「額外差餉」。

不過，決策局局長最苦惱嘅，未必係提交去立法會審議嘅條例草案太多，而係條例草案係咪具爭議。綜觀政府提交嘅廿二條條例草案，最具爭議同棘手嘅相信都係由政制及內地事務局負責嘅《國歌條例草案》，以及由環境局負責嘅《廢物處置（都市固體廢物收費）（修訂）條例草案》，呢兩條條例草案都係計劃喺今個立法年度上半年提交到立法會審議，聶德權同黃錦星可以話係綁住個炸彈，想揈都揈唔甩，想甩身更加係無可能喇。

將要審議《廢物處置（都市固體廢物收費）（修訂）條例草案》嘅立法會環境事務委員會主席何君堯都話，垃圾收費對於公眾嚟講，可能出一蚊都唔開心，「百分百接受係冇可能」，加上呢個議題已經講咗好幾年，但都未有細則出到嚟，所以都預咗會花好多時間去討論。不過，佢就認為要議而有決，希望政府可以做好宣傳教育同游說工作，等委員會審議過程可以順暢啲。

立法會政制事務委員會主席張國鈞就話，該會上年度已就《國歌法》立法呢個議題「過冷河」，上年度主席廖長江已召開過公聽會，做咗諮詢，所以對政府正式提交《國歌條例草案》都未有太擔心。不過，該會仲有另外兩條條例草案要處理，包括回應平等機會委員會建議，修訂現行四條歧視法例，仲有就功能界別選民基礎作技術性修訂及改善選舉程序嘅《選舉法例（雜項修訂）條例草案》，至於傾邊樣先，佢都話要下周同聶傾吓先知喇。