中環出更：細個鍾意打機顏明秀自認男仔頭
今時今日電競已經係運動項目，但舊時唔少人都覺得打機係不務正業。香港中華廠商聯合會青年委員會永遠名譽主席顏明秀，日前出席香港餐飲聯業協會青年委員會週年會員大會時講起打機，佢就話雖然自己係女仔，但細個都有打機，不過就成日畀父母鬧，因為父母覺得打機係男仔嘅玩意，而當時流行嘅格鬥遊戲佢哋更認為好暴力，唔適合女仔玩。
顏明秀話，當時網絡冇咁發達，所以好少同人對打，都稱唔上電競，而佢主要都係玩簡單嘅角色扮演遊戲。至於打機係咪男仔嘅玩意，佢就話，其實喺佢細個嗰陣屋企好多機械人，佢成日都拆晒啲機械嚟玩，久而久之都變得「男仔頭」。
餐飲聯青委會副主席黃浩鈞話，佢細個都沉迷打機，甚至半夜三更都要喺被窩入面打，好彩對眼完全冇近視。自從投身社會之後佢都少咗打機，係最近颱風「山竹」襲港，同兩個仔女喺屋企冇乜好做，先去買部遊戲機同佢哋一齊玩。
陳德健試過玩通宵畀阿媽鬧
餐飲聯青委會主席陳浩弘就少啲打機，都係做運動如健身、打網球等多啲。佢解釋從事餐飲業成日都食唔少嘢，所以點都要keep fit。不過佢都好支持電競，仲話如果一間公司或團體可以組織唔同團隊如足球隊、籃球隊、電競隊等，都有助加強團體合作精神喎。
講起電競隊，餐飲聯青委會會員陳德健就係電競隊成員。佢話自己由細到大都鍾意打機，細個仲試過喺網吧打通宵，搞到畀媽媽鬧，不過都仲兼顧到學業，只係間中打過龍。對於有啲日式餐廳、快餐店公司內部會組成電競隊以加強團結，佢就話自己公司唔會搞，皆因公司大部分都係中年婦女，同僱員以年輕人為主嘅公司唔同喎。
卓妮